Конституциялык сот президенттин кайрылуусун карап, мамлекет башчынын ыйгарым укугунун мөөнөтү жана президенттик шайлоону өткөрүүнүн жол-жобосун түшүндүрдү.
2021-жылы шайланган президенттин мөөнөтү 2010-жылкы Конституциянын негизинде алты жыл болуп эсептелет жана ал кыскарбайт
2021-жылдагы жаңы Конституциядагы беш жылдык мөөнөт мурда башталган президенттик мандатка карата иштебейт.
Президент жаңы Баш мыйзамдын талаптарына ылайык ишин улантат. Биринчи мөөнөттөгү алты жыл “эки мөөнөттөн ашпоого” байланышкан чектөөнүн алкагында биринчи мөөнөт катары эсептелет.
Мөөнөтүнөн мурда шайлоо өткөрүүгө негиз жок. Андай шайлоо Конституциянын 72-беренесинде так көрсөтүлгөн учурларда гана (өз ыктыяры менен кызматтан кетүү, импичмент, ооруп калуу же каза болуу) мүмкүн.
Кийинки кезектеги президенттик шайлоо 2027-жылдын 24-январында (январдын төртүнчү жекшембисинде) өтүшү керек. Шайлоону дайындоо тууралуу чечим Жогорку Кеңеш тарабынан добуш берүү күнүнө чейин кеминде төрт ай мурда, башкача айтканда, 2026-жылдын 24-сентябрына чейин кабыл алынышы зарыл.
Конституцияны ишке киргизген өткөөл жоболор Баш мыйзам менен бирдей юридикалык күчкө ээ.
