Алдын ала маалыматтарга караганда, үч жаран Подмосковьеде уулуу газга ууланып каза болушкан.
Буга чейин орус ЖМКлары трагедия Москва облусунун Дмитров районундагы курулуш объектилеринин биринде болгонун жазышкан. Ал жерде чет элдик курулушчулар иштеп жаткан. Болжолдуу версиялардын бири боюнча, өлүмгө имарат ичинде уулуу газдын топтолушу себеп болгон.
Маалымат булактарынын билдиришинче, каза болгондор Жалал-Абад облусунун Базар-Коргон районунун тургундары болушкан. Алардын сөөгү 30-апрелде Кыргызстанга жөнөтүлгөн.
Алдын ала маалымат боюнча, каза болгондордун бири — 1-Май айылынын 21 жаштагы тургуну, экинчиси — Правда айылынын 1996-жылы туулган тургуну. Үчүнчү жарандын өздүгү такталууда.
Орус ЖМКларынын маалыматына ылайык, каза болгондор Woodside Residence турак жай комплексинин аймагында иштеп жүрүшкөн.
Учурда окуянын бардык жагдайлары такталууда.
