Бишкекте эртең, 29-декабрдан тарта №146 муниципалдык автобустун жаңы каттамы ишке кирет. Жаңы каттамга 25 автобус чыгаруу пландалууда, ал эми кыймыл аралыгы 8-10 мүнөт болот.
Муниципалитеттен билдиришкендей, каттамдын баштапкы аялдамасы – “Бишкек автобекети” мамлекеттик ишканасы, акыркы аялдамасы – Чоң-Арык айылы болмокчу.
Автобустук каттам Аламүдүн жана Орто-Сай базарларын камтыйт.
Эскерте кетсек, Бишкек шаарынын мэриясы тарабынан айланма жол менен Алма – Ата көчөсүнүн кесилишинде (Аламүдүн району) Чыгыш автобекетин шаардын сыртына көчүрүү максатында Бишкек автобекети (“Бишкек автобекети” МИси) уюштурулган. Бөлүнгөн аянт 5 гектарга жакын.
II Элдик курултайда президент Садыр Жапаров Ош базарын, Батыш жана Чыгыш автобекеттерин шаардын сыртына көчүрүү тууралуу билдирген. Бул чаралар аймактардын экологиясын жакшыртууга жана унаа тыгындарын жоюуга жардам берет.
Бегимай Асанова