Кабулда өткөн бизнес-форумдун жыйынтыгында Кыргызстан менен Ооганстан жалпы суммасы 157 млн АКШ долларын түзгөн ниеттер жөнүндө 11 келишимге кол коюшту. Бул тууралуу Экономика министрлигинин басма сөз кызматы билдирди.
Иш-чараны «Кыргыз Экспорт» борбору жана Ооганстандын Соода-инвестициялык палатасы уюштурду. Форумга эки өлкөнүн бизнеси жана мамлекеттик түзүмдөрүнүн 100дөн ашуун өкүлү катышып, Бишкектен барган делегацияны экономика жана коммерция министри Бакыт Сыдыков жетектеди.
Кол коюлган документтерге ылайык, Кыргызстан телекоммуникациялык жабдууларды, цемент жана курулуш материалдарын, дары-дармектерди, бут кийим жана текстилди, ошондой эле азык-түлүк, анын ичинде кыргыз балы, жана айыл чарба продукциясын жеткирүүнү пландоодо. Келишимдер логистикалык кызматтарды да камтыйт жана Кабулда ачылган Кыргызстандын Соода үйү менен бирге ооган рыногуна чыгуу стратегиясынын бир бөлүгү катары бааланды.
Нурзаада Мурзаматова