Бишкектин 2050-жылга чейинки башкы планын бекитүү боюнча токтом долбоору 23-февралга чейин коомдук талкууга чыгарылды. Документти шаар мэриясы даярдаган.
Башкы план шаардагы функционалдык зоналарды жана маанилүү объектилерди аныктап, жаратылыш ресурстарын коргоо жана сарамжалдуу пайдалануу багытын көрсөтөт. Ал өнүктүрүү программаларында, курулуш жана жерди пайдалануу боюнча чечимдерде эске алынат.
Долбоордо башкы план жер мунапысынын объектилерине жайылтылбай турганы, ал эми өзгөртүүлөр Кабминдин өзүнчө чечими менен гана киргизилери жазылган. Мэрия 6 ай ичинде жер пайдалануу жана курулуш эрежелерин, деталдуу пландоо долбоорун даярдоого тийиш. Коомдук угуулар 2025-жылдын 24–25-декабрында өтүп, жыйынтыгы 13-январда чыккан.
