Кыргызстандык суучул Денис Петрашов Жапонияда өтүп жаткан Азия оюндарында күмүш медаль утту.
24-сентябрда 200 метрге брасс ыкмасы менен сүзүү жарышына 24 спортчу катышкан. Жарыштын биринчи бөлүгүндө кыргызстандык суучул 2 мүнөт 11,13 секунд убакыт менен жеңип, финалга чыкты.
Финалдык жарышта Петрашов 2 мүнөт 8,67 секунд убакыт менен экинчи болуп келип, күмүш медалга ээ болду.
Ал дүйнөлүк рекорд койгон 17 жаштагы жапониялык суучулдан 3,84 секундга артта калды.
Петрашов буга чейин 100 метрге сүзүүдө төртүнчү орунду ээлеген, эми 50 метрге брасс ыкмасы менен сүзүү боюнча да таймашка чыгат.
Кыргызстан 2026-жылдагы жайкы Азия оюндарына спорттун 25 түрү боюнча 181 спортчу менен катышууда. Өлкө эгемен тарыхында сегизинчи жолу Азия оюндарына барды.
XX Азия оюндары 19-сентябрдан 4-октябрга чейин Жапониянын Нагоя шаарында жана Айти префектурасында өтүп жатат.
