Бүгүнкү күндө Ысык-Көлдүн жээгинде болуп жаткан иштер олуттуу тынчсызданууну жаратууда. Бул тууралуу өзүнүн Facebook баракчасында биология илимдеринин кандидаты, Кыргыз улуттук агрардык университетинин ректору Нурзат Тотубаева жазды.
Анын айтымында, жээкти толтуруу — бул жөн гана курулуш элементи же бейтарап кийлигишүү эмес. Бул көлдүн жээк зонасын (литоралдык аймакты) — эң маанилүү жана эң алсыз бөлүгүн — бузуу болуп саналат.
«Дал ушул жерде негизги процесстер жүрөт: суунун өзүн-өзү тазалоосу, балыктардын көбөйүшү, биологиялык тең салмактуулуктун сакталуусу. Илимий көз караштан алганда, бул — бүт экосистеманын туруктуулугуна түздөн-түз таасир эткен аймак. Жээк толтурулганда, ал мурдагы калыбында кайра калыбына келбейт. Анын функциялары жоголот», — деп түшүндүрдү Нурзат Тотубаева.
