Бул тууралуу агартуу министри Догдуркүл Кендирбаева 27-апрелде «Биринчи радио» эфиринде билдирди.
Анын айтымында, өлкөдө көптөн бери так жана табигый илимдер боюнча адистер жетишсиз болуп келет, ошондой эле математика боюнча функционалдык сабаттуулуктун деңгээли төмөн бойдон калууда. Ушуга байланыштуу мурда адистерди тартуу үчүн 20% теңдөө коэффициенти киргизилген, эми болсо коэффициенттер теңделип, бардык мугалимдерге колдонулат.
Ал белгилегендей, буга чейинки айлык жогорулатууда методикалык кабинеттердин кызматкерлери — мугалимдерге жаңы технологияларды үйрөткөн жана тажрыйба бөлүшкөн насаатчылар эске алынбай калган. Натыйжада, алардын айлыгы президент колдогон демилге менен 100%га көбөйтүлдү.
Мындан тышкары, жогорулатуу кесиптик-техникалык окуу жайларынын кызматкерлерине, тейлөөчү персоналга, кошумча билим берүү мекемелерине, башталгыч класстардын мугалимдерине жана бала бакча кызматкерлерине да тиешелүү болду — эч ким унутта калган жок.
Анын айтымында, мектеп системасында болжол менен 97 миң адам иштесе, бардык категорияларды кошкондо билим берүү тармагында 190 миңдей адам эмгектенет. Жогорулатылган айлыктар үч күндүн ичинде төлөнүп баштап, банк карталарына которулат.
Министр айлык көлөмү ставкага жараша экенин айтты. Башталгыч класстар үчүн — 16 саат, тарбиячылар үчүн — 10 саат, предметтик мугалимдер үчүн — 18 саат. Эгер жүктөм аз болсо, тиешелүү коэффициент колдонулат.
Мурда 7040 сом болгон базалык ставка жогорулатылып, айлык ошого жараша эсептелет. Педагогикалык стаж үчүн 10%дан 30%га чейин кошумча төлөмдөр каралган. Мындан тышкары, класстык жетекчилик үчүн 2100 сом төлөнөт жана аймактык коэффициенттер да эске алынат.
Дептерлерди текшерүү үчүн кошумча төлөмдөр каралган: 1–4-класстар үчүн — жүктөмү 16 саат болгондо, 5–11-класстар үчүн — 18 саат болгондо айына болжол менен 2700 сом төлөнөт. Төлөмдүн көлөмү жүктөмдүн көлөмүнө жараша болот.
Эл аралык олимпиадалардын жеңүүчүлөрүн даярдаган мугалимдерге бир жолку сыйлыктар берилет:
1-орун — 500 миң сом,
2-орун — 300 миң сом,
3-орун — 200 миң сом.
Республикалык деңгээлде тиешелүү түрдө 10 миң, 7 миң жана 5 миң сом төлөнөт.
