Министрлер кабинети билет баасын арзандатуу үчүн ички авиакаттамдарга жыйымдарды алып салууну сунуштоодо.
Министрлер кабинети ички каттамдар үчүн жыйымдарды азайтуу боюнча токтом долбоорун коомдук талкууга чыгарды. Максат — авиакомпаниялардын чыгымдарын кыскартып, билет баасынын өсүшүн ооздуктоо жана аймактардын жеткиликтүүлүгүн жогорулатуу.
Долбоорго ылайык, бардык ички каттамдарда аэронавигация жана аэропорттордо жерде тейлөө акысы 50%га төмөндөйт. Ал эми сегиз социалдык маанилүү багытта туруктуу учкан ата мекендик авиакомпанияларды бул жыйымдардан толук бошотуу пландалууда.
Бул чаралар төмөнкүлөргө шарт түзөт деп күтүлүүдө:
-авиабилеттердин баасын турукташтыруу;
— учуулардын географиясын кеңейтүү;
-Баткен, Раззаков, Жалал-Абад сыяктуу шаарларга каттамдарды көбөйтүү.
Жаңы эрежелер токтом расмий жарыялангандан 10 күндөн кийин күчүнө кирет.
