Европалык аткаминерлердин баамында, АКШ жакынкы 24 сааттын ичинде Иранга аскердик сокку урушу мүмкүн. Бул тууралуу эки европалык чиновник Reuters агенттигине билдирген.
Алардын айтымында, бардык белгилер чабуулдун «жакындап калганын» көрсөтүүдө. «Азыркы АКШ администрациясынын ыкмасы ушундай — баарын белгисиздикте кармоо. Белгисиздик— бул стратегиянын бир бөлүгү», — деди булактардын бири.
Израилдик расмий өкүл да Дональд Трамп Иран боюнча чечим кабыл алып койгон болушу ыктымал экенин айткан. Бирок соккунун так масштабы жана убактысы азырынча белгисиз бойдон калууда.
Байкоочулар бул кырдаал Жакынкы Чыгыштагы чыңалууну дагы да күчөтүшү мүмкүн экенин эскертишет. Европада АКШнын кадамдары аймактык жана глобалдык коопсуздукка олуттуу таасир этет деген тынчсыздануу күч.
