КР Мамлекеттик салык кызматынын төрагасынын орун басары Мирлан Рахманов Ташкент шаарында өткөн Кавказ, Борбордук Азия жана Монголия өлкөлөрүнүн салык ведомстволорунун жетекчилеринин III форумуна катышты.
Форумдун башкы темасы — көмүскө экономика менен күрөшүү жана салыктык башкаруунун заманбап ыкмаларына өтүү болду. Кыргызстан бул багыттагы өз тажрыйбасы менен бөлүштү: ашыкча көзөмөлдөн баш тартып, санариптик кызматтар аркылуу ишкерлер менен өнөктөштүк орнотууга басым жасалууда.
Электрондук эсеп-фактуралар (ЭЭФ), ККМ жана «Салык төлөөчүнүн кабинети» сыяктуу инструменттер ак ниет ишкерлерге болгон административдик басымды азайтып, салык тутумун ачык-айкын жана ыңгайлуу кылууда.
Форумдун катышуучуларынын арасында өлкөнүн ири соода аянтчаларында («Дордой», «Кара-Суу», «Мадина») «Базар» маалыматтык системасын киргизүү тажрыйбасы өзгөчө кызыгууну жаратты. Санариптештирүүнүн натыйжасы айкын: фискалдаштыруунун аркасында бул базарлардан түшкөн салыктык кирешелер 2025-жылы 1 млрд 84,6 млн сомго жетип, өткөн жылдарга салыштырмалуу 64%га өскөн.
Мирлан Рахманов белгилегендей, фискалдаштыруу бизнести көмүскөдөн чыгаруунун жана кирешелерди ачыктоонун негизги механизми болуп саналат, бул өз кезегинде мамлекеттик бюджеттин туруктуу өсүшүнө өбөлгө түзөт.
